|
首先講明我係利物浦既ｄｉｅ ｈａｒｄ ｆａｎｄｓ！！由奧雲岩岩出頭既年代我就開始鐘意利物浦，不過鐘意左咁多年都仲係未拎到英超，唔知幾時先可以做得返８０年代果時雄霸英格蘭既戰績。有時對佢地真係好失望．．．希望依家有新班主，又有賓尼迪斯，仲有謝拉特，下一屆可以挑戰到冠軍啦～～
其實我成日都有上黎睇呢個論壇，我玩左ＦＭ都有成１０年，第一次玩仲係叫ＣＭ３。講左咁多題外話，其實係想大家幫我睇下我個陣容仲有冇咩問題：
我玩既係７．０１，依家玩到２０１１年，岩岩開１１－１２既球季。上年好慘，４大皆空，最巴閉係已經係打到入足總杯決賽，不過輸左俾車仔。唔知做咩上年成績奇差，聯賽得第１０！！其實開季果陣打得唔錯，８、９月果陣仲係榜首位置，之後一路咁跌，點打都升唔返上去，仲成日輸埋俾Ｄ弱旅，仲試過俾阿仙奴炒４：０！！！
之前果幾季既成績係咁：
＊２００７年：第４
＊２００８年：第１，歐聯冠軍
＊２００９年：第５
＊２０１０年：第１０
大家睇下，除左０８年果屆打得好之外，其他年年都唔知做咩事。不過我發現我隊利物浦係打盃賽穩定Ｄ，每年好多盃賽都可以打到去４強甚至決賽，係最尾先輸，到依家都淨係拎過一次歐聯．．．唔知點解打聯賽既成績會仲差．．．
本來我都唔主張玩ＦＭ用ｃｈｅａｔ，因為鐘意玩ＦＭ既其中一個原因就係貪佢接近真實．．．不過自從玩到２００９年第一次出現４大皆空既情況，果陣差Ｄ地位不保，好彩冇俾人炒，於是把心一橫，用左ＦＭＭ，係咁加球會既錢（我用ＦＭＭ除左用左呢樣野，仲幫佢「改建」埋個晏菲路球場，依家可以坐１０００００人！！都試過爆咁滯，足總盃對阿仙奴試過坐９９９８９人！！雖然已經唔再咁真實，但因為叫親班主加建，一係佢就唔制，到佢制果陣地方議會又唔制，等左３年先加得果幾千個位．．．），幻想利利物浦俾條大水喉射住，自此我隊利物浦就富有過車仔！！成日ｋｅｅｐ住有成億英鎊俾我買人！！！
自此之後我大手入貨（２００９年既６月），第一個買既係卡卡（４８ｍ），佢係我「第二最愛」（第一當然係謝拉特！），表現唔錯，仲拎左歐洲足球先生同英格蘭足球先生。之後到「第三最愛」——費蘭度‧托里斯（５７ｍ），佢黎左真係幫到唔少，起碼表現穩定，成個球季入左３０幾球（連其他比賽）。之後仲搵返奧雲返黎（１８ｍ），不過可能真係年紀大，鋒力已經同以前冇得比，通常都係打後備。其次買左阿古路（３８ｍ），表現都唔錯，係隊中既助攻王。呢度要提一提仲有個古治，雖然唔係場場正選，不過佢竟然係全季入波最多既人，入左４０幾球！！
其他買入既仲有蘭尼（Ｎａｎｉ，２０ｍ），其實仲有好多球星想買，不過好多都唔肯同我簽約，可能呢幾年成績麻麻掛？而呢年放走既人有高治（１１ｍ去左烏甸尼斯），懷斯（６ｍ）、馬克‧干沙利斯（１１ｍ）同沙比阿朗素（１４ｍ）齊齊去左皇馬，施素高（６ｍ）去左國米．．．
不過２００９年都打得唔係咁好，唔知係唔係班球員未磨合到。但係打左兩年（２０１０年冇咩買過球星，諗住發掘下Ｄ新人），點知上年仲強差人意．．．攪到心灰意冷．．．於是再大手買入！！
今年買左Ｃ朗（６７ｍ，暫時球會紀錄！）、卡基（ｂｏｊａｎ，巴塞果個，３０ｍ）、派路（１６ｍ）、沙治奧‧拉莫斯（１８ｍ）、Ａ．費甸南（２０ｍ）同泰禾（ｔａｉｗｏ，８ｍ），打造左另一支「銀河艦隊」。
今年（２０１１年）岩岩開球季，Ｃ朗真係勁，打第一場英超已經拎左ｍｏｍ；卡基都唔差，打左３場入左４球。仲有派路，雖然已經３２歲，但仲係好ｆｉｔ，打左６場拎左４場ｍｏｍ，仲入左２個自由球！
暫時開季成績唔差，４戰全勝，不過真係好驚佢又係「有頭威、冇尾陣」．．．
依家頭痛既係：我應該排個咩陣最好？以下係我用開既４－４－２陣式：
卡基 Ｆ．托里斯 （古治、阿古路） （奧雲）
Ｃ．朗拿度 卡卡 派路 謝拉特
（蘭尼） （謝拉特）（馬斯卓蘭奴）（Ｃ．朗拿度）
泰禾 艾加 Ａ．費甸南 沙治奧‧拉莫斯
（加歷查）
連拿
如果唔打呢個，就轉４－１－２－２－１：
Ｆ．托里斯
（卡基、奧雲）
阿古路 卡卡
（古治） （謝拉特）
蘭尼 Ｃ．朗拿度
（Ｃ．朗拿度） （賓納、謝拉特）
派路
（馬斯卓蘭奴）
泰禾 艾加 Ａ．費甸南 沙治奧‧拉莫斯
（加歷查）
連拿
好啦～～講左咁耐，希望大家可以幫幫我以下幾個問題：
１）大家覺得我應該用邊個陣好？
２）係兩個陣既位置上面，大家覺得有冇咩大問題？
３）其實呢條都算係黃金陣容（我心目中），到底仲差Ｄ咩可以改善？
４）係原有陣容上面，大家仲有冇咩球員介紹？（２０１１年）（唔擔心＄既問題～）
５）有冇好既ＤＣ介紹？（２０１１年）
希望你地俾Ｄ意見啦～～ｔｈｘ！！！
[ 本帖最後由 walkmansiu 於 2007-6-16 08:36 PM 編輯 ] | 
IP卡
狗仔卡
發表於 2007-6-16 18:34:08
提升卡
置頂卡
沉默卡
喧囂卡
變色å¡
顯身å¡
