|
|
發表於 2010-7-11 20:07:31
|
顯示全部樓層
http://wp.me/p7cGY-2ox
七月 11, 2010...9:00 am
荷蘭迷嘅憂鬱
荷蘭空軍決定無論荷蘭隊今晚捧唔捧到盃都好，乘載國家隊球員嘅飛機一入荷蘭領空，就空軍派戰機護送，有架F16直頭己經轉咗做橙色，亦即係荷蘭國家隊嘅傳統顏色。
有人問點解誇成咁，作為由細到大被教育成荷蘭擁躉嘅小弟，我諗我理解得到點解。
由1974年荷蘭對西德果次世界盃決賽開始，荷蘭果種十上十落嘅全能足球，令大家都承認荷蘭確係歐洲足球強國之一，小弟細個被父母長輩教睇波嘅年代，正係荷蘭三劍俠雲巴士頓、古烈治、列卡特拎歐洲國家盃嘅黃金年代，果陣荷蘭犀利更加不在話下，果陣小弟係唔明白，亦唔知道我成個家族過百年歷史，同呢個國家有乜淵源，仲膠到問點解唔捧英國隊（當然無英國隊，英國係一拆為n隊，分別係北愛爾蘭、英格蘭、蘇格蘭、威爾斯、海峽群島同曼島，海峽群島同曼島兩隊係魚腩嚟，通常被人劏，未計百慕達果啲海外領地）。
問題係，荷蘭次次係熱門，次次喺分組賽、十六強或者八強打到興高采烈，但喺四強之後就同金盃無緣，當十幾廿年都係咁果陣，作為荷蘭球迷果種憂鬱真係可想而知。德國四屆季軍（好膠嘅稱號），正因為德國人太厭煩鋪鋪都季軍同殿軍，所以今年除非入決賽，否則無巡遊，結果唔駛講，小弟識啲德國朋友個個失望到爆，連再重演1974年德荷大戰都無。大家諗吓，荷蘭人邊有唔誇到搵空軍嚟迎接嘅理由？
呢次荷蘭拎到金盃嘅最大對手係西班牙，呢個感情仲複雜，荷蘭本來係西班牙屬地，皆因神聖羅馬帝國皇帝卡爾五世，將尼德蘭（荷蘭嘅正式名稱）分咗俾西班牙國王，但尼德蘭信喀爾文派，西班牙佬信係天主教，結果大家都估到，就係開大片。日後演變成荷蘭人同西班牙人為爭取獨立，由陸地到海上開片開足八十年，即係八十年戰爭（Nederlandse Opstand, Tachtigjarige Oorlog）。而今日荷蘭國歌，即係反抗西班牙嘅戰歌。
而喺足球上，荷蘭國家隊嘅人咁勁，咁荷蘭好多足球員退役後都去各國教波，有好似希丁克咁做咗全能足球傳教士，教到大韓民國同俄羅斯嘅波都有荷蘭人嘅影子。而告魯夫等人去咗巴塞羅那教波，經歷過多任荷蘭人執教後，巴塞變咗好有荷蘭影子，都係踢全能足球，而今年西班牙國家隊，竟然大部分都係巴塞球員，結果呢鋪仲複雜，荷蘭佬喺西班牙嘅弟子打荷蘭佬，當中關係複雜到頭暈。
不過，西班牙國家隊嚟自半隊巴塞，又係好膠一件事，巴塞羅那對皇家馬德里嘅聯賽賽事，唔識睇波都識歐洲政治都知嘅西班牙打吡賽，因為巴塞羅那代表加泰羅尼亞地區，正係一個分離主義盛行嘅省份，喺佛朗哥法西斯獨裁統治期間，加泰羅尼亞語係被禁用，最近有膠人建議廣東嘅電視台唔用廣東話都招嚟大量粗口問候，以前蔣介石膠到禁用台語都搞出多年血海深仇，大家諗吓加泰羅尼亞人對西班牙有幾忠心？由於巴塞羅那代表住加泰羅尼亞被迫害嘅歷史，而以前皇家馬德里係佛朗哥大量泵水過嘅皇牌球隊，所以西班牙人可以由你支持巴塞羅那定皇家馬德里，大概估到你嘅政治立場，同情內戰果陣共和派，即係依家社會黨班友，同埋加泰羅尼亞、巴斯克分離主義，多數係巴塞羅那擁躉，而支持長槍隊（佛朗哥）嘅多數係皇家馬德里擁躉。
小弟只係小學同中學受過好基本足球訓練，但天分就無乜，你叫我講波即係擺我上檯，不過，足球背後一連串恩怨情仇，我都講得到。畢竟有時睇波，唔係真係因為邊個球員靚仔，特別喺歐洲，好多時國家同歷史因素，可以搞到一場賽事好複雜。
Short URL: http://wp.me/p7cGY-2ox
後話：有人問點解荷蘭用橙色，因為荷蘭王室係姓Orange，奧蘭治係由Orange譯過嚟，橙色係荷蘭王室代表顏色。仲有，荷語成日有啲一大堆 A, E, I, O, U等響音字母撞埋一大堆嘅拼寫方法，Oei點解三個都係響音，因為呢個係黃嘅福建話，喺荷蘭統治印尼果陣拼寫嘅拼音，所以姓Oei一定係印尼果面嚟，仲要家族喺印尼歷史至少一百年，所以好多姓Oei或者Oey嘅人，依家都係喺荷蘭，甚至有人以為係荷蘭姓嚟（咁事實係荷蘭拼法），歐洲人睇個拼法，大家都估到你嚟自邊度。 |
|
IP卡
狗仔卡
顯身å¡
發表於 2010-7-10 00:09:41
發表於 2010-7-10 17:03:21
