|
|
發表於 2007-3-5 11:52:56
|
顯示全部樓層
曼聯球迷版賽後報告 
4點45分, 一個本應訓緊覺既時間又要我彈起身睇波...曼聯作客晏菲路對利物浦, 上一次曼聯主場憑第500次上陣既史高斯同費迪南各入一球贏2-0, 今次作客有傑斯第700場上陣, 希望有好結果....
兩隊周中都有歐冠比賽既情況下都作出調動, 利物浦方面有艾加代替希比亞做正選, 左路有懷斯同M干兩人, 曼聯仍都用最強陣容出擊....左閘仍然係艾夫華.....
上半場雙方都互有攻守, 攻勢以利物浦較為旺盛....12分鐘先有遠射能力不俗既艾加左路推順30碼遠射僅僅高出
1分鐘後, 一個三角進攻, 傑斯既傳球經中間既曼聯球員駁一腳傳向左路衝上黎既艾夫華, 艾夫華底線前地波傳中, C朗拿度受壓下地波射柱邊出界
其後芬倫右路傳中, M干門前一頂無力被雲達沙沒收
23分鐘, 曼聯上半場最有威脅既一個攻勢, 加利佬將個波傳去右邊禁區頂既拿臣. 拿臣後爭傳俾C朗拿度, 可惜後者選擇射門而並冇傳波俾中間無人緊釘既朗尼, 最後射門仍都高出
26分鐘, 維迪禁區外犯規, M干踢橫太大力, 但懷斯仍然能夠起腳, 個波飛向左邊柱邊出界
30分鐘, 芬倫後場大腳解圍, 維迪受壓下被比拿美偷掉皮球, 然後地波傳中, 可惜古治來遲一步
36分鐘, M干禁區外起腳太正被雲達沙沒收
41分鐘, C朗拿度中場右邊拎到個波發動快速反擊, 落底時被加拉查剷走個波, 其後傑斯禁區外一個直線俾朗尼又未能好好控定, 再被加拉查一腳清走
上半場艾夫華頻頻上前助攻...傑斯偏向去中間什至去右邊搵食較多...由於艾夫華頻頻助攻又不回防既關係, 經常要維迪單挑今場表現活躍既比拿美...而後者仍都多番製造險情...就算高峰狀態既維迪尚且對比拿美都會被後者既速度同靈活比下去, 更何況而家狀態下滑, 疲憊不堪既維迪? 曼聯半場以0-0 進入更衣室實在有些幸運成份....
下半場一開波利物浦就向曼聯施壓, 先有古治傳中, 謝拉特球不著地勁射高出, 之後一個攻勢, 古治中場推順後直線傳俾甩開左維迪既比拿美, 可惜後者推橫之下面對住加利佬既壓力一射軟弱無力被雲達沙救出
49分鐘, 比拿美企圖傳中被維迪省出, 謝拉特巧妙地將個波斬俾禁區頂大約30碼既懷斯, 懷斯球不著地一射, 可惜有少少撻Q, 彈地入禁區, 比拿美門前一射射破雲達沙十指關, 可惜被判越位, 慢鏡睇到 有可能係施素高再加一頭改變少少方向而造成越位
51分鐘, 高波吊入禁區, 古治心口控前, 但謝拉特同比拿美先後射門都被曼聯守衛擋出, 個波輾轉落到懷斯腳下, 最後一射仍僅僅高出
其後利物浦攻勢有所收儉, 曼聯以施維施達入替頻頻助攻既艾夫華, 再以沙夏入替應該係最後一場在英超比賽中上陣既拿臣, 另一方面利物浦仍以奧尼里奧入替下半場表現沉著既M干, 以及以賓納換入今場表現出色既比拿美
72分鐘, 朗尼被加拉查攔截, 後者被罰黃牌, 但同時朗尼卻右腳流血受傷, 費SIR即時以奧沙換入朗尼...此時我並不睇好呢個調動...
77分鐘, 沙夏禁區外控定皮球, 被沙比阿朗素同加拉查前後夾擊之下, 沙夏突然轉向推過加拉查殺入禁區, 企圖帶橫推過艾加之時被後者有意無意間踢跌, 但球證並冇吹罰12碼
2分鐘後, 賓尼迪斯以高治換入今場表現較差既施素高
80分鐘, 傑斯右路開出角球, 里奧費迪南頭槌被連拿沒收
86分鐘, 球賽牽起高潮, 因為史高斯被沙比阿朗素犯規, 憤而出拳還擊, 雖然未能打中阿朗素, 但足以被球證以紅牌罰離場, 賽後費格遜對此紅牌仍無異議...
之後利物浦傾力進攻, 賓納同古治既配合之下由後者傳中, 遠柱高治無人看管下竟然選擇心口控定, 最後起腳一射被雲達沙救出
剛進入補時階段, 傑斯左路搏得芬倫犯規, 由C朗拿度主踢罰球, 罰球直飛向連拿懷抱, 但後者被沙夏衝前干擾之下甩手, 皮球落在奧沙面前, 芬倫同謝拉特都來遲一步之下被這名入替後幾乎完全隱形既球員近距離一射入網, 最後曼聯劣勢之下以1-0 險勝利物浦
綜合整個下半場, 利物浦佔盡優勢, 雲達沙再一次神級既表現為曼聯拿下這場賽事...今年曼聯既後防係今個世紀曼聯最穩定既後防...(當然如果可以唔用艾夫華就更好了)...雲達沙今季多番撲救最後可能為曼聯撲下今季既聯賽冠軍...
費格遜所作出既三個調動都非常適合, 施維施達雖然多次在自家後防內大玩高章波, 但最後都順利解圍....總好過經常讓維迪處於極之不利狀態既艾夫華, 沙夏今場踢左兩腳好波, 第一腳當然係單人匹馬殺入禁區可惜被艾加踢跌, 第二腳就係干擾連拿....而奧沙仍都不用多講了...連續兩次補時階段入波奠定勝局既曼聯, 莫非真的再一次受到幸運女神既眷顧? 當然...我都不得不承認在比賽最後階段入波奠定勝局既球隊係十分可惡的....(呢件事我WINNIG都成日做XDD), 但要做冠軍就必先要贏得這些比賽....
球員評分:
龍門: 雲達沙 (9分): 除左入波之外所有野都做齊了....神乎其技
後衛: 加利佬 (6.5分): 助攻機會較少, 所受威脅仍都唔多....多謝艾夫華吧
里奧費迪南 (7分): 季初係維迪幫佢補鑊...而家係時候到佢發揮120K 的價值了
維迪 (6分): 被艾夫華惡搞了一番....但狀態下滑都係不爭既事實
艾夫華 (4.5分): 的確, 你今場助攻表現係不錯, 但你今場防守爛極了...點解比拿美右路面對住既係維迪唔係你?!
中場: C朗拿度 (6.5分): 反擊第一武器, 除左上半場浪費一個黃金機會之外, 表現尚算可以...
史高斯 (6分): 好彩你果拳打唔中...唔計呢拳基本上今場史高斯表現係比卡域克好的
卡域克 (5.5分): 我用電腦睇波, 唔係好見到你既樣...又唔係好聽到旁述講你個名...
傑斯 (6.5分): 被艾夫華逼遷了...不過中路傳球既表現都唔錯
前鋒: 拿臣(7分): 可能太高分, 但係後爭一腳傳俾C朗拿度實在太神了
朗尼 (6分): 控球仍然需要改善, 但今場佢都算勤於走動的...
後備: 施維施達 (5.5分): 唔玩波既話我唔介意你打左閘的
沙夏 (6分): 雖然有幾次反擊都因佢控球太耐而被對方搶掉, 但一球個人突破實在值得加分
奧沙 (8分): 名副其實既一箭定江山...出場後一上鏡就入波了 |
|
IP卡
狗仔卡
主場淨係輸比冠軍 , 都叫做好睇d
顯身å¡
發表於 2007-3-4 12:27:29
