畢爾包食古不化陰乾身家

國米~魂

畢爾包食古不化陰乾身家
文： 徐浩然 15/05/2007
http://football.on.cc/football/new/20070515/fbnewa0171x0.html

寧要血緣，唔要財源！
西甲球壇最老牌班霸畢爾包，創會過百年都係只起用巴斯克種族球員宗旨縱橫賽場，不過，一本通書又點能夠睇到老呀？唔能夠與時並進，唔識變通，就算換埋班主同練都搞唔掂隊波，今季隨時搞出事降班。呢齣豪門大悲劇仲有個零月上演，記緊實呀！

畢爾包都係老牌班霸？冇錯，西甲o係一九二八年成立，至今僅得三支球隊一直參賽至今，從未降班，除咗人所共知兩支班霸巴塞隆拿同皇家馬德里之外，原來第三支就係畢爾包，佢地歷來贏過八次西甲冠軍，另加二十三次西班牙盃冠軍，咪睇佢地近年成績滑落，查實往績勁到嚇親你。

堅持傳統寧願降班
不過好景不常，隨住近年國際足球一體化，畢爾包單靠自己人比賽，結果咪成績大跌囉。上季尾都仲叫做搵得番名帥基文迪打救執番條命，到今季基文迪走佬，換黎經驗不足既沙利基特，以致依家既艾奴爾做教練，統統都幫唔到手，依家勉強叫做逃離降班區，多尾三既皇家蘇斯達四分，但一日唔識變通，一日幾難望佢地翻身。

其實季初陪同基文迪離開既，仲有會長拉米基斯，不過負責接掌職務既卻係球會史上首位女會長安娜烏傑祖，難為人地女人持家，接手之後先發覺係個爛攤子，就算話大搞改革，仲話要起新球場又點？成班主力個個做咗倒米壽星愈踢愈沉，就好似d豪門大家族咁，艾斯巴利亞、烏沙斯、耶斯迪同加比朗度等統統變晒敗家仔，正所謂巧婦難為無米炊，球會就算有多多身家，都畀佢地輸清光啦！

事實上，近年有份雜誌做過統計，結論係超過七成六畢爾包球迷都係話寧願見到球隊降班，都話唔肯放棄佢地個巴斯克種族主義，呢份高尚情操雖然令人尊敬，但一個唔覺意踢埋今季，下季真係要乙組再見喇。


成也巴斯克敗也巴斯克！
重用巴斯克血緣球員出戰，創會初期曾經為畢爾包帶黎唔少殊榮，但最終卻成為球隊戰績衰落主因。不過，你估球會高層又唔知發生緊咩事吖，近幾十年佢地已經不斷偷雞「陰d陰d」修例，就連前法國國腳李沙拉素亦曾經係畢爾包一員黎o架！

畢爾包o係一八九八年創會，去到一九一二年當最後三個外援離隊之後，正式徹底執行純巴斯克血統政策，所有非我族類統統冇得留低，而o係新政實行初期，畢爾包出產咗大量一級球星，o係一九二○年西班牙參加奧運，總共二十一名代表入面，就有十四個係巴斯克人，當時畢爾包正正係國家隊第一大戶，連皇馬都要行埋一邊。

法國兵李沙拉素曾入隊
不過隨住巴斯克軍團戰績下滑，畢爾包亦由之前以血緣判定入隊資格既規定，放寬到只要o係巴斯克地區成長、o係巴斯克地區學習足球技巧，甚至係o係法國既巴斯克人地區出生既球員都可以入隊，當中最具名氣既自然數到首位法國出生既畢爾包球員李沙拉素。而現時球隊唯一既「外援」就係墨西哥出生既伊圖拉亞加，但出場機會就一d都唔多。


巴斯克係乜？
巴斯克自治區位於西班牙東北部，其自治區包括阿拉瓦、基普斯誇同比斯開三省，首府為畢爾包鄂。呢個自治區一九七九年十二月成立，面積七千二百三十三平方公里，人口達二百一十萬，並擁有自己的語言。由於具備頗深的文化根基，巴斯克地區一直有脫離西班牙獨立旳呼聲。


4大敗家仔逐個睇
畢爾包家道中落，怪都怪佢地班後人唔爭氣，其中以下呢四個球員，辜負著球會同球迷既期望，演出一直未達預期，堪稱球會既敗家仔：

1 失聲雄雞 前鋒艾斯巴利亞
今季上陣次數/入球：24次/3球
簡評：外號「雄雞」既佢，係球隊副隊長，曾經入選西班牙國家隊超過五十次，但今季落親場都冇貨交，同全盛期相比差咗一大截。


2 回塘浪人 前鋒烏沙斯
今季上陣次數/入球：30次/7球
簡評：巨人中鋒曾經效力多間西班牙球會，自九七年加入畢爾包成入球機器，但今季表現跌Watt，連正選都冇鬼埋。


3 流攤天才 中場耶斯迪
今季上陣次數/入球：34次/5球
簡評：被譽為畢爾包難得既中場天才球員，今季卻演出飄忽，性格愛蒲爛玩，加上自覺懷才不遇，經常被指落場未盡全力。


4 反骨神童 中場查維馬天尼斯
今季上陣次數/入球：31次/3球
簡評：舊年用成六百萬鎊舊年用成六百萬鎊買返黎既超新星，今季迅即取得正選位置，天分毋須懷疑，唯一最敗家，係有消息話佢今季尾隨時會過檔巴塞隆拿。          ---------- 艾斯基路.........


點解間條波衫藍變紅？
係咪覺得畢爾包件紅白間條衫有d熟口熟面呢？相傳畢爾包創會初期，係著藍白間條波衫出戰，直至到一九一○年先至轉為紅白間條，至於點解套波衫會轉顏色？一直以來有三種說法：

1.英國根源？ 真確性：7分
相傳畢爾包係一群由英國新特蘭遠赴西班牙既煤礦工人，以及來自修咸頓既船塢工人組成，而為咗紀念來自新特蘭同修咸頓英國根源，因此就揀左同呢兩間球會一樣顏色既波衫。

2.斷貨？ 真確性：5分
盛傳話當年球會曾經派人遠赴英國去買藍白間條既波衫，點知去到之後，竟然發覺全部賣晒，斷晒貨，o係無計可施之下，負責買波衫人見衫就買，結果佢地最終帶番西班牙就係紅白間條波衫。

3.貪平？ 真確性：9分
據講當年藍白色布料其實好貴，反而有唔少用黎做床單既紅白色布料就好鬼平，而買番黎再將佢轉做波衫，成本都一樣夠抵，兼且唔難搞。當時既決策人最終咪因為貪平，揀咗紅白色間條波衫囉！

(註：真確性10分為滿分)

講野無point的人

當年留得住華維迪就唔洗搞成咁

TAMTOM

無x聊

奇連士文再生

不過，你估球會高層又唔知發生緊咩事吖，近幾十年佢地已經不斷偷雞「陰d陰d」修例，就連前法國國腳李沙拉素亦曾經係畢爾包一員黎o架！

(8+1)講
利沙拉素有巴斯克血統架

hehe0114

嘿
好一句食古不化

Keith

烏沙斯都唔後生喇, 你仲旨意佢做入球機器咩

Hakkinen

原帖由 hehe0114 於 2007-5-15  13:15 發表
嘿
好一句食古不化

唔知邊個先係食古不化

肥仔麟

人地個地方文化背境同歷史咁特別 ........ 無得咁話人既

熱刺#29戴維斯

2 回塘浪人 前鋒烏沙斯
今季上陣次數/入球：30次/7球

呢個數字你仲想點
不如話羅蘭迪打唔起



o9

畢爾包

寫呢篇野條友完全係垃圾，無料唔好寫la！
領隊方面，當年華維迪係自已離開，同留與否並無關系。之後沙利奧加迪於季初被炒，由利尼上位，當年佢一手帶領alaves殺入歐協決賽，領軍能力唔會太弱。
「陰d陰d」修例呢度完全係錯誤，球隊規章中從無限制過用人，多用血緣同係球隊青年軍出身一向都有，唔好亂寫。
文中話隊中幾位球員敗家，其實都錯。etxeberria今季表現並非太差，加上受傷影響。urzaiz自上季起都非正選，但都有七球在手，都差？yeste自出身後已有球隊希望佢過檔，但都不為所手動，落場唔博呢度又錯，今季佢長期受肌肉過度疲勞影響，有心無論力而已。愛蒲爛玩呢度連當地傳播界都無賣過，消息來源都不知從何而來。j.martinez同樣都無消息會轉會barca，消息來源不明，我非常懷疑呢條契弟點寫呢篇野。garbilondo今季就真係踢得衰。
本人身為畢爾包球迷，實在無法容忍愛隊受到一位無知而武斷亂吹之輩對球隊胡來茶毒！本人強烈譴責該文作者及刊登該文之傳媒！

Keith

耶斯迪真係成季聽都係紮住上陣, 睇佢又唔係話太差啫

Yoshiki

痴孖根

CYBASTER

原帖由 Keith 於 2007-5-15  02:00 PM 發表
耶斯迪真係成季聽都係紮住上陣, 睇佢又唔係話太差啫

呢篇野根本亂黎

FlyingDonkey

原帖由 畢爾包 於 2007-5-15  01:58 PM 發表
寫呢篇野條友完全係垃圾，無料唔好寫la！
領隊方面，當年華維迪係自已離開，同留與否並無關系。之後沙利奧加迪於季初被炒，由利尼上位，當年佢一手帶領alaves殺入歐協決賽，領軍能力唔會太弱。
「陰d陰d」修例呢度完全係錯誤，球隊規 ...

完全認同, 話人食古不化個D 唔該讀下巴斯克歷史同西班牙近代史先

講野無point的人

原帖由 畢爾包 於 2007-5-15  01:58 PM 發表
寫呢篇野條友完全係垃圾，無料唔好寫la！
領隊方面，當年華維迪係自已離開，同留與否並無關系。之後沙利奧加迪於季初被炒，由利尼上位，當年佢一手帶領alaves殺入歐協決賽，領軍能力唔會太弱。
「陰d陰d」修例呢度完全係錯誤，球隊規 ...

但我仍然覺得
如果果時華維迪肯留低
呢兩年就唔洗搞成咁

TAMTOM

原帖由 講野無point的人 於 2007-5-15  07:13 PM 發表

但我仍然覺得
如果果時華維迪肯留低
呢兩年就唔洗搞成咁

都就護到級啦

Chris_Webber

我提議去投訴佢！

逍遙

原帖由 CYBASTER 於 2007-5-15  05:14 PM 發表


呢篇野根本亂黎

大把友仔呃稿費

逍遙

ANYWAY, 呢隊波點都好過切X達

HackerWong

點解硬係要用所謂既"國際趨勢"去量西班牙的風族文化?