10大「勁波金曲」起舞Ball場

rob_van_dam

每逢年頭，樂壇有好多頒獎典禮，05年球壇咁精采，《東方波經》一向多諗頭，有創意，搞左個「十大勁波金曲」頒獎禮，十首入圍歌曲包保令你聽出耳油，更特設「金曲金獎」，由利物浦勇奪殊榮，恭喜晒。曼聯雖然成績一般，但就呢度連中三元，都算個安慰獎。  

金曲金獎：《抗戰二十年》
Beyond／利物浦

歌詞：Woo～～你我霎眼抗戰二十年，世界怎變，我答應你那一點，不會變～～

Beyond呢首《抗戰二十年》，代表住佢樂壇奮鬥廿年，先得到依家成就，而利物浦亦都同Beyond一樣，奮戰廿年，等到頸都長埋，至生生性性再捧歐聯錦標！「紅軍」一九八四年打敗羅馬，第四次捧走歐冠杯（歐聯前身），利物浦九十年代跌落低谷，直至近年終於復甦，去屆歐聯一吐烏氣，戲劇性擊敗ＡＣ米蘭到歐聯錦標，事隔廿一年終於威番次，紅軍抗戰二十年成功！  

鄭少秋／巴塞隆拿、車路士
得獎金曲：《無敵是最寂寞》

歌詞：無敵是最寂寞，最是痛苦～～

巴塞隆拿如日中天，西甲同歐聯十三連勝，你話全世界仲有邊隊可以同佢踢！「細哨」朗拿甸奴做埋歐洲同世界雙料足球先生，勁！

車路士季初亦試過九連勝，有博彩公司提早於去年十月初派彩畀投注車仔英超冠軍球迷。

兩隊分別西甲同英超玩晒，秋官名曲《無敵是最寂寞》岩晒feel。

古巨基／新特蘭
得獎金曲：《必殺技》


歌詞：不要讓我，一敗塗地，輸得更多，OH～～

古巨基大聲唱唔想「輸得更多」，「黑貓」新特蘭睇都要跟住唱，希望對手聽到唔好再贏佢。新特蘭英冠無敵，點知上到英超變成魚腩，一開咧已經連輸五場，去年十月中開始更直落輸十場，包括九場聯賽一場杯賽，搞到冇晒信心，直到依家，佢地係聯賽既分數仍然係個位數字，認真大鑊。

真係懷疑新特蘭識唔識踢波，班波渣成咁樣，睇黎要學下古巨基呢首歌，唔夠打，咪求下人地放過你囉。

趙學而／古迪仙尼
得獎金曲：《最佳位置》

歌詞：無論你喜歡誰，請你記住留下給我這位置，時常在內心一隅，空出幾吋為我堅持～～

趙學而翻唱《最佳位置》好正，亦唱出車路士門將古迪仙尼心聲。

古迪仙尼以前係球隊首席門將，仲有人建議佢入籍英格蘭做一號門將添，不過施治加盟車仔後，古迪仙尼被打入冷宮，不過佢好安守本分，仲同車路士續約，留守住呢個「最佳位置」！  

陳奕迅／尼維利兄弟
得獎金曲：《夕陽無限好》

歌詞：多好玩的東西，早晚會放低，從前並肩的好兄弟，可會撐到底～～

曼聯由學徒踢到上一隊，加利尼維利同菲臘尼維利兩兄弟多年來相依為命，但係細佬菲臘仔今季同「紅魔鬼」結束十年賓主關係，轉投愛華頓，兩兄弟分道揚鑣。

加利仔今季仲做埋「紅魔鬼」隊長，菲臘仔亦搵到落腳地方，各自發展，不過佢有一個共通點，就係年紀都唔細，足球事業開始「夕陽無限好」囉！

陳小春／費格遜
得獎金曲：《獻世》
歌詞︰即使不抵，都要眼閉，我這種身世，有甚麼資格獻世～～

陳小春做「失戀王」，歌愈慘愈有市場，呢首《獻世》慘到無倫，唔只「犯賤」仲要「獻世」，真係乜尊嚴都冇晒。一手創建曼聯王朝費格遜，亦都江郎才盡，依家佢仲留曼聯，直情係「獻世」。

曼聯近年已經冇碇企，上季四大皆空，今季亦冇改善，歐聯分組賽包尾出局，連足協杯資格都唔到，墮入黑暗期，費格遜絕對係責無旁貸。佢已經冇辦法化腐朽為神奇，已經out晒，係度「獻世」，擁躉冇眼睇。

黎明／傑斯
得獎金曲：《一言為定》

歌詞：也許在要分手那天，至夠勇敢來兌現，可否以後陪我過，我不會說了就算～～

「黎天王」情深款款出動巨型鑽石頸鏈番女友，曼聯同傑斯亦「箍煲成功」，為呢個力十五年「愛人」，曼聯終於肯讓步，向傑斯提供一紙兩年合約，到二○○八年先屆滿，到時傑斯將會曼聯踢到退休。

曼聯同傑斯將要「分手」之時，終於知道舊將好使好用，傑斯都可以算飲得杯落啦。

葉振棠／施丹、尼維特
得獎金曲：《大俠霍元甲》

歌詞：衝開血路，揮手上吧，要致力國家中興～～

都唔使講點解啦，施丹同尼維特復出救國舉動，同我大俠霍元甲絕對有得揮。法國同捷克世界杯外圍賽緊急關頭，兩位精神領袖復出，對球隊士氣有莫大提升作用。施丹帶領法國隊出線，尼維特亦附加賽復出，勇闖決賽周之後又引退，真正為國家而戰，分精神真係令人佩服。

鄭中基／魯爾
得獎金曲：《無賴》

歌詞：為何還喜歡我，我這種無賴，是話你蠢還是很偉大，在座每位都將我踩，口碑有多壞，但你亦永遠不見怪～～

鄭中基扮死狗自嘲係無賴，但仍然得到好多靚女垂青，皇馬隊長魯爾同佢一樣。

皇家馬德里「金童」無復當年勇，國家隊同球會都冇料到，入波數字大減，比賽時行行企企，貢獻有幾多大家有眼睇。魯爾走下坡，但皇馬仍然話佢係精神領袖，就算踢得幾差，皇馬「亦永遠不見怪」！

葉德嫻、陳潔靈／孫繼海
得獎金曲：《千個太陽》

歌詞：熱我心，是你一個，無人可吹得熄，火太陽千個～～

孫繼海英國叫做「東方太陽」，雖然受到傷患影響，但係並冇氣餒，慢慢養好傷患之後，繼續安守本份，好一定有人知，去年年尾，領隊皮雅斯再度重用佢。

孫繼海成就唔單只令中國人驕傲，亦得到英國皇室肯定。去年十一月初，中國國家主席胡錦濤到訪英國，「老孫」獲邀參加國宴，地位獲得認同，孫繼海於曼徹斯特甚至整個英國都發光發亮。

Carr

東方.....膠x10

Blackburn_Owen

TO Man U

鐘聲響起歸家的信號                          --歐聯
在他生命裡 彷彿帶點唏噓                 --費sir


年月把擁有變做失去                          --英超皇者地位
疲倦的雙眼帶著期望                          --曼聯球迷
今天只有殘留的軀殼                          --陣容
迎接光輝歲月


振作呀...曼聯!!

陳星龍

原帖由 Blackburn_Owen 於 2006-1-1  11:34 AM 發表
TO Man U

鐘聲響起歸家的信號                          --歐聯
在他生命裡 彷彿帶點唏噓                 --費sir


年月把擁有變做失去                          --英超皇者地位
疲倦的雙眼帶著期望   ...

咁都得
你真係

HackerWong

Raul..

Manu super fans

咁有創意...

Chris_Webber

原帖由 陳星龍 於 2006-1-1  11:38 AM 發表

咁都得
你真係

好過東方 d 歌啦
一個忠實曼聯 fans 的心聲。

最愛鬈髦飛

原帖由 rob_van_dam 於 2006-1-1  10:31 AM 發表
皇家馬德里「金童」無復當年勇，國家隊同球會都冇料到，入波數字大減，比賽時行行企企......

如果佢都算比賽時行行企企, 呢個球壇再無球員可以被形容為"勤力; 肯走動"~

白粉報, pls shut up~

捷克NeVeD子彈

原帖由 Carr 於 2006-1-1  11:12 AM 發表
東方.....膠x10

乘夠100啦

FlyingDonkey

原帖由 HackerWong 於 2006-1-1  01:36 PM 發表
Raul..

http://hkcm.hkehost.net/forum/vi ... &extra=page%3D1

stephenlion

亂咁黎~

new614

好膠呀東方波經... = =

Zero

亂踩Ferfuson同Raul,收啦....

基維爾重生版

support my hero, Raul !