呢條友無得救

rob_van_dam

曾獲「樂壇校長」譚詠麟力捧的前男子三人組合E-Kids成員阮民安（Tommy），本周三隻身前往澳門回力娛樂場豪賭輸清光，竟向賭場內的「疊碼仔」借貴利，借十萬元實收八萬元，更被起釘至二十四萬元，最後遭兩名彪形大漢押返香港收數，驚動電影公司老闆林小明出面「講數」，最終議價償還十二萬元，今日內須繳清尾數。

現年二十六歲的阮民安，早前剛從內地拍劇返港，據悉本周三（十二日）晚突然賭癮大發，隻身到澳門回力娛樂場豪賭。可惜他當晚的賭運不濟，不久已輸光賭本，惹來賭場「放數」的「疊碼仔」搭訕，游說借錢博翻身，阮民安先借兩萬元，但所謂「輸開有條路」，兩萬元轉眼又輸清。

據了解，當時「疊碼仔」再落嘴頭游說阮民安加碼，急欲翻本的阮民安遂借多八萬元，但今次實際只取得六萬元，即前後借十萬元實收八萬元，期間「疊碼仔」更代他「推碼」（下注），最終輸清收場，此時阮民安才獲告知要數二十四萬元，身無分文的他提出開支票還債被拒，對方隨即派兩名彪形大漢押送他返港追數。

林小明親自出面斡旋
消息人士透露，阮民安前日整天在兩名彪形大漢監視下四出籌錢仍無落，至深宵時分，他硬頭皮致電經理人及寰宇電影公司老闆林小明求救，眾人相約於尖沙咀亞士厘道一間名為「4 Uncle」的酒吧商談，本報記者現場所見，在等候林小明等人到來期間，阮民安疑怕遭人認出，一直戴漁夫帽，多次「頭耷耷」進出酒吧傾電話，神色慌張，不停踱步徘徊，兩名彪形大漢則陪伴左右。

當時酒吧內尚有六、七名大漢，據知均是債主在港的手下，有人不斷催促阮民安想辦法還債，又有人提議陪他返屋企，叫家人代還債，阮民安聞言即說：「？唔好啦，唔好搞咁多！」期間雖然有人曾考慮報警，但想到曾簽下欠單，怕報警亦理虧而作罷。

消息人士續稱，事件最終要由林小明親自出面斡旋，提出「欠債固然要還錢」，不過利息實太高，對方終同意只需要阮民安連本帶利償還共十二萬元，僅為最初要還二十四萬元的一半，阮民安即場先還一萬元作為利息，餘數要在今日內還清才能擺平事件。

承認到賭場否認欠債
不過，兩名彪形大漢未有即時離開，更於凌晨時分「護送」阮民安上的士，跟他返回黃大仙鳳凰的住所，確定他的住處後才離開。

阮民安昨午出席商台直播節目後，被記者問及豪賭及借大耳窿的事件，戴上「黑超」的他表現鎮定，承認曾到澳門賭場，但一度否認欠賭債，其後沒有再回應。他的經理人楊劍標則表示，今日會交代事件。


退出娛樂圈吧喇你

肥仔麟

可能事業有轉機 , 公司幫佢還錢 , 一定幫佢勁接job , 要佢還錢比公司

射手shooter

睇個樣就知係明燈格

stephenlion

真得假先

JasonDelPiero

原帖由 stephenlion 於 2006-7-15  08:32 AM 發表
真得假先

7分虛構
3分事實
賭錢應該係真既

納比

我記得哩條友n年前頒獎禮羅獎都識講"感謝主",估唔到而家變到咁壞

灰袍聖徒

孫中謝拉特.奧雲

雖然郁禮賢都唔hit得去邊~但都好過你咁樣整花自己個名

Manu super fans

如果你仲可以係娛樂圈打滾就真係天無眼~

.保路.

其實我唔明點解會有唱片公司肯要佢 個外型真係...仲要個底咁花

hehe0114

女朋友個fd係tommy既fans leader
有d野有補充


有話tommy唔係自己過大海
係有fd同佢過，而呢個fd就係成q日都跣佢既
借錢果時話好似邦民果d咁還(咁都信?)
借5萬，今日之內還24萬
講數後還12萬

另外
佢地只會係不斷咁爭經理人公司錢
話每次出show既衫、化妝、租車錢都要自己俾


大家自己判斷實情喇

射手shooter

【東方日報專訊】阮民安（Tommy）於本月十二日赴澳門賭場豪賭借貴利被押返港，一晚籌夠十二萬元，昨日已還清債務，不過仍躲避傳媒，只透過經理人表示今後不會再賭錢，但又被揭發合組新E-kids廣 告

時，與拍檔合資的十二萬元數目不清，令一手提攜他的譚詠麟(新聞 - 網站 - 圖片)斥他一錯再錯。

Tommy赴澳門回力娛樂場豪賭借貴利，最後被大漢押返港收數，驚動寰宇電影公司老闆林小明出面講數，把原定連本帶利廿四萬元減至十二萬。Tommy前晚連夜向友人籌錢，昨日終把債務還清，據知林小明今次「出面不出錢」，因認為Tommy並非因急病或家事，賭債應由賭仔一力承擔。

事件曝光後，Tommy再被揭發曾有數目不清的前科。據知他與林泳、林中定所組成的新E-Kids，曾合資十二萬元行政費用，款項全數存入Tommy戶口，由他出面請人作歌，惟款項花光，卻只完成了兩首歌。又有保母車司機爆料指去年Tommy欠下近萬元車債，該司機還指Tommy反咬他以短訊出言恐嚇。

阿倫斥一錯再錯

身處上海開騷的阿倫，對於Tommy豪賭借貴利一事說：「佢一錯再錯，希望佢真係後悔，賭真係唔好，望佢改過！（繼續支持佢？）好多無法再支持，要靠佢自己。」阿叻則謂事件乃意料之內：「有惋惜，佢有自我同自負，小聰明反而害佢。」

而Tommy則於昨午單拖出現黃大仙寓所，頭耷耷走後門登車離開。電影公司原定於昨午舉行記招交代事件，惟昨晨突然取消，改由Tommy經理人透過電話發言，他承認Tommy曾赴澳門賭場，但卻堅稱並非豪賭：「當時有『疊碼仔』見佢有名氣，話借錢畀佢，佢一時衝動就借，輸幾萬蚊！Tommy好後悔，知錯，亦答應家人、公司以後唔再賭，畀心機做！（佢自己還錢？）總之有人幫手，解決！（公司有冇行動？）會繼續合作，佢雖然唔係乖仔，但唔係壞人，希望大家畀空間佢！」

舊拍檔為錢反目

新E-Kids成員林泳對於合資費用不知所終一事，他煞有介事說：「件事過咁耐，唔想再提！」已退出的林中定則表示當時很嬲，亦曾為事件傷和氣：「我諗住錢搵得番就算，點知冇耐隊組合都摺埋！上寶貴一堂。」他寄語Tommy要珍惜前途。舊E-Kids成員郁禮賢則不覺Tommy好賭，不知事件真偽而不便評論，望Tommy努力做個好偶像，改掉壞習慣。

而Tommy原定於今日與王秀琳(新聞 - 網站 - 圖片)到青衣出席PlayStation活動，惟昨日他以返內地拍劇為由取消，改由Red Noon頂上。據知，Tommy在昨晚返內地拍劇避風頭。

Yoshiki

原帖由 射手shooter 於 2006-7-16  05:26 PM 發表
而Tommy原定於今日與王秀琳(新聞 - 網站 - 圖片)到青衣出席PlayStation活動，惟昨日他以返內地拍劇為由取消，改由Red Noon頂上。據知，Tommy在昨晚返內地拍劇避風頭。

.........

肥仔麟

佢一出道果時已經笑佢mk

Smithy

原帖由 肥仔麟 於 2006-7-16  06:55 PM 發表
佢一出道果時已經笑佢mk

三個e kids當中佢最mk

Liverman

人辦

[ 本帖最後由 Liverman 於 2006-7-16  07:13 PM 編輯 ]