無聊小故-----第六集

魯爾~小明

第六集


星期六o既呢一晚,我緊張到訓唔著,就咁訓左o係間床度,望住個天花板,睇睇個鐘已經係凌晨三點半,原來已經
足足望左個天花板四個鐘頭零三十分鐘.....................

"鈴鈴鈴......."第二朝鬧鐘係咁響,嘈醒左我,雖然尋晚好難得至訓得著,不過我一d猶豫都無就起左身,因為
今日係我兩個月以黎第一次踢返波,而且好難得咁約齊成班老朋友一齊踢添...........

唔知係唔係心急o既關係,我好快就到左球場,仲係最早到o個個添,早左成十五分鐘到........
呢一度就係保安道球場,當年我爸爸就係o係呢一度踢波,而佢亦o係呢一度長大,記得有一日我無聊得滯,
搵左d舊相出黎睇,其中一張就係爸爸o係度踢波,另一張係佢同成班隊友一齊影,o個陣我拎住呢兩張相去同佢
傾計,傾左好多野,佢話自己當時打咩位都得,又話佢o個隊贏過當時o既南華預備組等等,我再望下張相,相入面
o既佢同依家眼前o既佢真係爭好遠,歲月催人老,眼前o既佢已經係一個開始有白頭髮,腳又痛,手又痛o既中年
男人,唔係中年,係接近老年添,相入面o既佢係一個十幾歲o既後生仔,單腳踩住個波擺晒甫士咁,o係佢o既眼神裏
面,我感受到當年佢o個份衝勁,但眼前o既佢,雙眼只有因為工作而帶來o既疲倦,其實我真係好想同佢一齊踢波,
有時見到人地兩父子一齊踢波,自己真係好羨慕,不過隨著我爸爸o既身體愈黎愈差,年紀愈來愈大,我知道我呢
一個願望永遠都唔能夠實現,而且今時今日o既佢已經完完全全放棄左足球..........

今日佢o既下一代,亦即係我踏足呢個球場,感覺好特別,其實想黎呢度踢好耐,但成日講講下都無左件事,今日終於都可以o係度踢返場波,可惜呢一度同以前已經唔同晒.............

無幾耐,劉志峰佢地都到齊晒,o係我側邊換緊衫肥肥矮矮呢個就係劉志峰,佢係打後衛,o個陣一路不斷睇住佢進
步,唔知依家佢o既實力又會去到邊呢,o係出面禁區頂射波射到砰砰聲o個個,佢叫鄭梓傑,佢打中場o既,當年我覺得佢係全隊最出色o個個黎,射波又勁又準,攻又得守又得,好全面o既一個球員,打緊守門員呢個叫劉健威,有名你
叫,健威喎,一聽個名就知絕對唔係流o架啦,佢o既絕技就係石地撲波,所以成日攪到隻腳損晒,到依家為止我仍然
好佩服佢o既勇氣,熱緊身o個個叫鄺浩楠,一個好硬淨o既後衛,佢都係好博命o架,成日又訓波又飛剷咁,企o係佢側邊o個個叫楊家樂,都係打中後場,防守o個方面做得好稱職,我會用四個字去形容佢-----------"無名英雄"最後頭髮短短地呢個就係我以前前鋒線上o既拍擋鄭先波,佢o既速度真係好快,但唯一o既缺點就係單蹄馬一隻,淨係得右腳o既o者.......................

呢個時候,o係我地對面龍門有一班人,有老有少咁,有三個係上左年紀o既呀叔,而另外o既就係幾個身材好高大o既後生仔,其中一個仲係打龍門添,過左無耐,佢地過黎撩我地鬥波,七打七,我地當然奉陪到底...........

開波lu,我地龍門就梗係劉健威啦,後面就劉志峰同鄺浩楠,中場就係鄭梓傑同楊家樂,一攻一守,而我就打返前鋒,老拍擋依然係鄭先波,同以前我地一齊踢波o既陣容完完全全一模一樣........

而對面就以三個呀叔打後衛,其他o個d就好自由,無固定位置........

我第一次掂波已經甩腳,好明顯無掂過個波咁耐,狀態不足,打左無幾耐,對方已經完全控制晒戰局,去唔到o既就
慢慢搓,搵到機會就突然黎一下快o既,而且佢地好似踢慣踢熟咁,好有默契,唔洗用眼去望已經知道自己隊友走位
走去邊,佢地一腳波過,無一個球員係掂多兩腳,組織性真係好強,而且佢地仲識利用兩邊,無論我同鄭先波點樣努力去標波都無用.......

好難得o係左邊局到一個呀叔無位比波,但我仍然比佢蝕住個身位,鄭先波襯呢個時候埋去偷到個波,之後佢一路
o係左邊快放,落到接近底線,因為佢要"吸"返右腳,所以拖慢左成個攻勢,好彩最終佢都出到個波,我快另一個呀叔一步將個波輕輕印返禁區頂,鄭梓傑第一時間起右腳施射,個波射得好行,一直向住左上角飛埋去..........

對方龍門飛身一救,直情將一個咁勁o既射門抱住,手法仲係極之正宗,驟眼睇一個咁高身材o既龍門,估唔到都有咁好o既反應.............

之後戰情係一面倒,我地係比人壓住半個球場黎打,人地又黎一個攻勢,幾下短傅已經到我地禁區頂,鄺浩楠一訓,
o個年輕人將個波輕輕一挑,好輕易就過左,之後一下好快左腳將個波搓向右腳再搓返左腳過埋劉志峰,淨係睇呢一下,已經知道呢個人唔簡單,佢直推埋龍門成單刀,襯劉健威出迎輕輕熨向遠住,我o係前面睇住呢球波輸得之際,楊家樂飛身剷左個波出底線,護到呢個空門,真係唔知幾時佢走返後,仲要咁快,都話左佢係無名英雄o架啦...

呢個時候,我地輸一個角球....


(待續)

FabioCanNaVaro

望住個天花版四粒半鐘

基維蝦

[QUOTE=FabioCanNaVaro]望住個天花版四粒半鐘[/QUOTE]
望一個鐘都吾掂啦....haah~

FabioCanNaVaro

[QUOTE=基維蝦]望一個鐘都吾掂啦....haah~[/QUOTE]
我望半粒鐘幾精神都訓著