~ - 二

choy991044

2004 年 6 月 11 日

昨日之戰況如下:

由小龍帶領之部隊於到達目的地後, 兵分2路, 第一小隊由小龍親自率領, 連同麻甩基, AV糠, 龜爺, 連同小配角之一, 小擔泥, 於北河街街市附近作戰, 而第二小隊則有閒塞立, 粘米黃, 井狗, 連同我, 於不知名橫街搏殺. 戰役展開未幾, 第一小隊已傳來好消息, 由麻甩基及AV糠利用其彼此間出色之默契, 屢次夾擊敵軍, 未夠5分鐘已經開齌. 相反, 第二小隊於頭三十分鐘卻全隊交白卷, 雖然井狗, 小配角之二表現落力, 曾多次突擊敵軍, 但卻屢戰屢敗, 接戰三十分鐘, 全隊皆認為此處乃雞肋之地, 於是第二小隊決定與第一小隊會合, 轉戰北河街街市. 兩隊會合之時, 正值各大小師奶落街買送之黃金時期, 所以任務進行得相當順利, 各隊員相繼建功, 到了黃昏6點半, 又係時間講byebye, 除了井狗外, 全隊皆有成績. 初登舞台, 成績尚算不錯, 於是便班師回朝了.

以下為部份真實資料 -
首名開齋隊員 - 麻甩基
最後開齋隊員 - 龜爺
殺敵最多隊員 - 麻甩基
殺敵最少隊員 - 井狗
被粗口問候最多隊員 - 粘米黃
最好彩隊員 - AV糠 (因為竟然有人自動送上門)

畢竟年輕人血氣方剛, 考完ce 急於搵錢, 又冇工作經驗(抄功課經驗倒是十分豐富), 又冇熟人照住, 又覺得搵錢好似唔係好難, 於是是但但搵左呢份推銷長途電話服務既工, 其中以基大佬最為大志, 聲稱要於開學前搵到五位數字之薪酬, 志大, 想頭也大, 但能力卻不太大. 根據可靠情報, 基大爺截至九月一日, 合共賺取高達4百多元的三位數字薪金, 賀.

2004 年 6 月 18 日

呢個星期都係咁, 返工放工, 行遍九龍新界各大小街市, 值得一提的是, 某甲於第三天已經當了逃兵, 總成績為2張單. 另外有一日我自己連同德國仔, 鬼火麟&狗仔凸(此三人皆是同班同學, 戲份頗重)過左太古洗地毯, 幾過癮, 起碼頂癮過企街賣電話先

下午3時左右, 芬妮屋企 (芬妮者, 同班同學也, 家境富裕, 是為太子女, 家中面積足夠容納我班二十多人, 我班曾多次以此地為節日慶祝之基地), 是日為班聚會.

"喂, 你唔洗返工咩?" 狗仔凸劈頭就是這句
"唔撈啦, 騙人既勾當, 身水身汗先得2-3張單, 仲要唔一定張張有錢" 沒錯是我, 我和粘米黃均已經炒了老闆魷魚, 但其餘四人仍然過著吃力不討好的生活. (我們六人中, 我只和龜爺同班, 其餘均為他班, 故是次活動六人當中只有我和放工後才到的龜爺出席)
"打牌啦, 打牌啦, 打牌啦..." 鬼火麟, 爛賭耳之首

良久.
"三萬, 喂, 咁鬼悶, 快d 講下人是非." 鬼火麟道.
"上, 有乜講?, 白板" 雞糠, 另一同班同學, 賭鬼之一
"碰你隻白板, 你來來去去都係講o個d, 好鬼悶, 二筒" 狗仔凸.
"咪係, 碰呀, 紅中" 這次是我.
"哈, 又碰, 中發白碰曬了, 大三元is coming~~, 南 "
"你地又唔講下, 齋聽, 五萬,
"又上, 我九章了, 底褲"
"頂, 無啖好食, 四筒"
"噢, 白板喎, 槓..."
"哈, 搶槓十三么, 多謝曬"

冇獎問答遊戲 :
1) 誰糊出了?
2) 我對面係邊個?

深夜12時半
"喂, 睇波啦, 睇波啦"
"打緊機, 咪嘈"

深夜2時半
"仲未開波咩"
"頂你, 又失一球啦"

深夜4時半
"喂, 乜q都踢完啦, 仲未播"
"聽晚先轉播呀頂你"

------待續------