無聊小故-------第十二集

魯爾~小明

第十二集



方紫瑩拖住個男仔,臉上面流露出o既係一副好甜蜜,好開心o既樣,至於個男仔,又高大,又有型,又靚仔,我的確係無得比o既,就係咁,我眼白白咁睇住佢地行出便利店o既門口,雖然我好唔開心,但呢一刻我真係喊唔出.....

而我呢就係咁一個人o係街度流連,諗起頭先點樣令球隊輸波,諗起呀銘點樣好輕易咁推過我,再諗起方紫瑩頭先好甜蜜o既樣,我始終都再忍唔住,眼淚就好似爆水管咁一下子不停咁湧晒出黎,我再控制唔到自己o既情緒...

突然有人o係後面拍左我o既膊頭一下,我回頭一望,原來係劉健威.........

"家豪,頭先走左去邊呀,一踢完波就唔見左人...."

我一望到係佢,即刻擰返轉頭,用手好快咁將d眼淚抹乾.....

"哦!無,去左買野飲乍ma....."
一開聲,發覺自己把聲開始有d沙沙地...

"咦!定豪你隻眼做咩咁紅o既,做咩事呀你,你喊過黎呀...?"
佢好驚訝咁問...

"梗係唔係啦,我眼訓得滯流眼水乍ma....."
"係唔係有咩事呀......?講出黎啦,你呃唔到我o架啦..."

我亦再忍唔住,o係佢面前係咁喊......

"家豪呀....!!好啦好啦,唔好咁啦,睇你個樣都未食飯o架啦,一齊食飯慢慢再講啦..."
佢用佢強勁o既手臂,有少少溫暖o既手搭住我o既膊頭........

o係間快餐店度,我簡左一個窗口位黎坐,眼光光咁望住出面d人,見到一d好甜蜜o既情侶,我又再諗起方紫瑩..
劉健威幫我叫左碟飯.......

"你o既至愛呀,粟米肉粒,食飯啦..."

我望住碟飯,無謂口食得落.....

"喂呀,有咩事都好填飽個肚先啦...!係咪因為頭先踢波輸左而唔開心呀,唔好怪自己啦..."
劉健威一邊開解我,一邊將佢o個碟飯大啖大啖咁擺入口......

佢呢個人就係咁大情大性o架啦,講野又直接,乜野都無所謂o既,我前兩年o係私校度識佢,因為佢咁o既性格,我地兩個好快就傾得埋,跟住我就拉埋佢加入我地隊波度,成為左我地隊波o既剛門......

"記唔記得兩年前私校o個個女仔呀?"
我終於忍唔住出聲....

"哦!長長地孿孿地頭髮o個個ma,我梗記得啦,你愛人喎...!!"
"頭先我見到佢.............."
"下,咁都見得返呀,有緣喎,係就快d上啦,兩年前叫你上又唔上,唉..."
"佢已經拖住第二個lu...."
"下,唔怪得你頭先喊得咁勁!嚇親我呀,我第一次見你喊乍....."
"唉....!"

我唔知再可以點樣答佢,不過見到佢食飯呢個樣,再加埋佢講o既野,講野o既語氣,我o既情緒已經平復返好多,記得兩年前,同佢o係學校係咁吹水,係咁玩,講人是非,的確好開心,總之每次見到佢都會好開心啦.....

佢個電話突然響起左..

"喂!肥妹呀,咩事呀.....依家同朋友食緊飯呀....幾時返?就o架啦.....得啦得啦....長氣...係咁先啦...!"
佢對住個電話透過空氣中送左一個吻比電話裏頭o個位人兄,之後將個電話放返落衫袋度...

"肥妹?兩年前o個個呀..?"
"係呀,好鬼死長氣o架佢...我食完啦,你慢慢啦,唔好咁無心機啦,無左一個未搵第二個o羅,唔洗死o既,我走先啦拜!"
"洗唔洗咁快手呀,安慰下我好喎,喂..有異性無人性..."

我望住佢急急腳離開呢間快餐店,發覺佢同以前完完全全無變過,仍然都係咁開心咁過每一日,更難得o既係佢永遠總會為身邊o既人帶黎快樂.......

"多謝你呀!劉健威..."

(待續)

孫中謝拉特.奧雲

正故

FabioCanNaVaro

今期mama地