|
|
可能係因為奧雲啦,對布力般都有機會直播(我身在澳洲).
四個中場主力(我諗冇人會反對)都缺陣之下,本來我都唔睇好.
3比0 算係一個驚喜吧.但係是喜是憂冇人知,會唔會係一連串勝利o既開始,或者只是所謂o既迴光返照呢?本來應該可以踢走桑拿士,宜家又俾佢吊下鹽水.
不過,贏波始終係開心o既!
講下個別球員先.
基雲:我覺得,我打一百次球員評論,佢都係只得兩個字,穩健,好悶呢~
巴巴耶路:一路我都會用佢同班納比,我始終覺得比較靈活o既佢係好過前者,甚至,好過佢當年o既球員競爭對手布歷治,不過...就唔好搵迪漢奴o個D俾喇,對佢唔公平.講番今場,佢一樣搶眼,幾多波踢,貢獻一個助攻俾尼索比亞.
保桑:一連串低級失誤似乎令人地對佢o既信心,同佢自己對自己o既信心都有所動搖.今場睇佢都仲係患得患失咁.今場o既表現都未如理想,始終,我眼中o既佢有一定質素,對佢要求自然比較高.希望佢快d重拾信心.
泰萊 係呢個佢成長o既重要時期,我真係好希望有人可以教曉佢點樣打好一個中堅,點樣避重就輕,唔好一遇到難纏o既對手就犯規(唔係話一定要好clean,不過適當o既犯規都係一門學問),如果成為習慣就好有問題,呢樣o野亦都會決定佢他日可以成為一個一流球員,或者係次級.佢絕對有資質成為一個一流球員.比拿美為佢上 o左好寶貴o既一課.
卡爾:比較上,好似冇巴巴咁搶,但係佢o係右路o既助攻防守都有相當作用,不過我對佢印象唔深.難以俾咩深入評價.
尼索比亞:雖不致於光芒四射,不過一定係超水準表現,佢打法比我想像中來得實際,好事.一個助攻一個入球,再度成為紐卡素頭號搶分功臣.仲係後生o既佢將來應該大把機會發揮,不過我比較擔心盧基傷完之後,佢又會成為咩角色.變陣棋子?佢係值得球會俾多D機會佢,一定值過o個個8萬鎊先.o係疲弱o既紐卡素攻勢之中,仍然為紐卡素左路帶來一點衝擊,唔係好好,不過可以接受.
非爾,保耶,Lee Clark(點譯??):點解呢三個要一齊講呢?因為我覺得佢地都係紐卡素制造中場斷層o既最大功臣.你可以見到紐卡素o既攻勢歸零,佢地居功不少,前線確實係完全欠缺支援,或者,佢地防守上有一定功勞,不過唔明顯,亦都唔可以令我原諒佢地進攻上o既無能.(太偏激吧?我唔識講,搵人講下佢地.)
奧雲:作為"純射手"o既佢,今場最主要工作就係o係最最最前線同舒利亞鬥企.如果話上面三位人兄係紐卡素零攻勢o既主要功臣,奧雲佢本人都可謂功不可抹.佢同宜家o既亨利係兩個極端.亨利極唔安份,永遠唔鐘意守o係禁區接應,鐘意不停搵波踢,佢老哥就完全唔搵波踢,唔係唔得,如果你技術呀,射術呀,身型是但一方面好D,你都可以專心o係前線等波到,完成最後工作就得.咁你宜家先天已經係有缺憾,你仲唔勤力D,擴大自己活動範圍,真係冇人幫到你.睇下人地比拿美點踢好唔好?anyway,頭鎚入o左一球,頂得幾好,抵讚(我唔理佢係唔係好彩啦,不過對面個白痴
後衛就真係唔知攪乜).而舒利亞o既入球都好似係佢搏番o黎.ok啦~
舒利亞:佢個入球話俾大家聽,就算佢宜家咩都冇,都仲有射術.活力唔駛諗嫁喇,要佢拍奧雲呢個"純射手"唔係咁好,宜家舒利亞一定要人幫佢制造空位.制空權佢都仲搶到,不過今場o既二傳有D失準,可以再做好D,不過我都係o個句,唔應該再俾舒利亞做主力,佢真係退緊,如果想中場後上多D威脅,搵個好D o既 post player啦.
巴布爾:出場時間唔多,冇失魂,仲打得幾好,或者我一路對佢有偏好,我覺得佢絕對有力坐穩正選中堅一席,雖然宜家泰萊都難以捨割,而搵佢拍泰萊又未必好.都幾可惜,好期望佢同泰萊有朝一日一齊入選大國腳.
今場波上半場真係睇到我扯火,究竟佢地打乜?我會覺得,今場贏波係有D好彩,或者話布力般俾我地打得更差,舒利亞入球係成場波轉捩點,如果唔係輸o左都未可知.中場做唔到輸送,前場亦都提供唔到適當支援,要好好考慮呢對前英格蘭拍擋o既效率,今時唔同往日呀.傷患問題要快D解決,場場都出唔到FULL TEAM唔掂,我對我地FULL TEAM中場好有信心.
我貪心,我覺得前線要搵人替舒利亞,而o個一個,唔係艾美奧比. |
|
IP卡
狗仔卡
發表於 2005-9-19 01:30:43
提升卡
置頂卡
沉默卡
喧囂卡
變色å¡
顯身å¡
發表於 2005-9-19 01:42:04
