無聊小故---第一集

魯爾~小明

第一集



"好耐都無試過我地兩丁友咁樣坐o係度吹水啦,係呢,近排點呀...?"
"係呀,講真我都好耐未黎過呢度lu!近排點呀?都無咩點,畢左業之後又搵唔到野做,我都唔知可以點?"
"你前排又話博下去左南華會考預備組o既?結果呢.?"
"唉!唔好提,去到發覺自己同其他人爭成皮波.......?"

某公共屋村o既一個足球場,觀眾席上兩個年輕人o係度吹水,其中一個係我,
係喎,講左咁耐唔記得介紹自己添,我個名叫李家豪,而我身邊呢個就係我小學識到依家o既
好朋友------劉志峰....................

以前我地兩個同其他朋友成日黎呢個球場踢波,初初o係度無邊隊可以夠我地踢,但當大家一路長大,
所行o既路個個都唔同,結果走下又一個,走下又一個,我地隊波就遂漸遂漸咁散...

當中最熟o既就係劉志峰,起碼仲有保持聯絡先,得閒都會約出黎o係呢個球場度一邊睇人踢波,
懷念下以前o既日子,一邊講下心事,無心事o既話就吹下水咁,講真,我真係好鐘意呢種感覺,人生有一個
可以同你傾到計,你又信得過o既朋友,其實真係極之幸福......

"唔好講我啦,你呢,已經係中六生啦喎,遲幾年,我就要叫你大學生啦..."
"咁到時畢業你一定要黎呀,同我擺返幾圍賀一賀佢..."
"咁梗係啦,到時我借錢都要同你賀一賀佢......."
"哈哈哈............"

------------------------------------------------------------------------------------------------
一個月之後,我決定繼續去搵我o既機會,上次考南華預備組衰左,今次唯有試下澎馬流浪預備組....
其實自己都無咩信心可以加入足球呢一行,但橫掂暫時又無野做,又無書讀,試下簡條自己鐘意o既路黎行,
都未嘗唔係辦法........................

呢一日,一個充滿熱誠o既我懷住緊張o既心情向住跑馬地草地足球場進發,坐o係o架巴士度,不斷o係度諗
返上次去南華會考預備組o既情形,從中吸取失敗o既經驗ma!!

突然有一把好溫柔o既聲同我講 "唔該你有無五蚊呀?我咁o岩無散銀..."
我抬頭一望,我眼前係一個長長地孿孿地頭髮,大約同我差唔多年紀o既女仔,唔知點解我硬係覺得好似唔知o係邊
度見過佢咁,我借左五蚊比佢,佢比完錢之後簡左同我一齊坐,不過都唔算簡o既,成o架車都差唔多滿晒,得返我
隔離同坐我前面o個個呀伯隔離有位,咁梗係簡坐我隔離啦,雖然我算唔上係咩靚仔,但點都好樣過個呀伯掛...

沿途我一路偷望佢,發覺真係勁熟口臉,我不斷係咁諗,終於比我諗到,原來佢就係我兩年前暗戀o個個女仔,
佢叫方紫瑩,記得o個陣我o係一間私校repeat中五,當時第一眼見到佢我就鐘意左佢,但我自己好被動,
始終都唔夠膽主動識佢,所以大家一路都無講過野,直到離開呢間學校都無,不過其實我個心係極之唔捨得佢,
估唔到今日會見返佢,仲係佢主動同我講野,哈,真係無諗過會係咁,記得劉志峰同我講過,世界上無野係無可能,
依家我信啦....

"叮..!"巴士個電鐘響左一下,我要落車啦,今次雖然同佢好短暫咁見過一臉,但心情同兩年前一樣都係咁唔捨得,
算吧,今日o既目的係要選拔,無謂野唔諗,我落左車,一眼都無望返轉頭,直奔球場..............

(完)