六月廿四日 早上五時四十四分
正式出發
再見咁多位
廿九號再見
向內蒙出發 – 親切的黃沙 (第一日 六月二十四日 晴)
時晨大概是五點鐘，剛睇完世盃最後一場分組賽，雖然整晚沒有睡眠，但精神卻仍飽滿，應該是因為期待吧。完成最後行李點算後，開始玩相機，拍低「離開前的一刻」，點知鬼馬婆婆依個時候醒左，不停問我食唔食早餐，又問我食唔食蕉，攪到我都有點尷尬。
六點鐘，正式出發，搭到地鐵既頭班車，有點意外一朝早已經咁多人，香港真係一個繁忙既社會。
0638，同班fd剛好到達旺角中旅社，又一個估唔到，已有部份人到達，不止我們幾個對這旅程有期待嘛﹗
七點三，旅遊巴向深圳開出，第三個估唔到，估唔到依家D旅遊巴咁鬼死靚，拍得住飛機果下得人驚。
過左兩個關，大概九點鐘終於到達到深圳寶安國際機場，外觀睇落去都唔錯架，但入面嘛……淨係自動售賣機入面D水係黃色已經夠嚇死人……攪左兩個鐘，值機埋(Check in也，內地係咁叫既)，十一點鐘左右終於起飛，點知，依個時候就發生第一個人間慘劇，我竟然失敗到昨晚唔記得叉電，部相機冇電﹗﹗救命呀﹗﹗……卒之，望住窗前無邊際既雲海慢慢飛過，一切只可留在我的腦海中……
冇得影相之下，我唯有補充番我既睡眠，話晒果面都有得睇波嘛，嘻嘻。不過飛機餐好快就送到，雖然食就唔係太好食架啦，但見佢個包裝咁靚，而且冇聽鬼馬婆婆話食個早餐先，已經飢不擇食。
成個機程大概有三個鐘，隔黎兩個都係唔識既，冇得傾計又冇野玩，都幾悶，點知依間航空公司有D野玩-----底價$500既機票競投，雖則我得個睇字，但過程既刺激都幾好睇，而且有咁既諗頭去吸引客人，係限米煮限飯之下，依個創意都值得欣賞下。
下午兩點正，安全到達左呼和浩特機場，強調安全依兩個字係因為係飛之前唔係好信得過大陸果D航空公司，但估唔到成個過程都好穩定下，拍得住其他國際航空公司，大陸野唔係下下都差嘛~
正當乘車到賓館時，發現周圍都好多工地下，而且商店都幾多，除左鋪名會多左行蒙古字之外，基本都同一般內地較繁華既城市都冇咩大分別。聽我地個導遊講(趙先生，係內蒙古大學外事處處長)，原來內蒙古連續幾年都保持住兩位數既正增長，所以會見到城市不斷發展緊，尢其當中幾個大城市，即呼和浩特同包頭咁。怪得之啦……
三點鐘，到達酒店，當晚我地係住係內蒙古大學入面既桃李湖賓館，命名既原因係因為附近有個桃李湖，但神奇在我地係酒店房入面點睇都睇唔到個桃李湖……番到房，除左即時放低晒D行李之外，第一時間就係開著部電視搵CCTV5同埋叉電，哈。
四點鐘，無啦啦開會，原來當晚有個歡迎晚會，內蒙古大學學生會同我地傾下計玩下遊戲咁，開會就係為左要揀個司儀、諗遊戲同埋表現節目。曾經有衝動諗過做唔做司儀，但始終仲未突破到自己個心態，成日話要做好自己，但依樣做幾廿年都未做到……卒之，司儀有左人選，遊戲都有左頭緒，到表演嘛，分組自行決定。依照慣例，慢熱既我唔會太快有意見(因為Load得慢…)，但我唔怕做參與，有左初步Idea之後，輔助既角式就由我做啦，哈。至於表演D乜，一陣先講。
六點鐘，晚飯時間，成班真係呆晒係度。唔係D食物唔岩胃口，而係多到離晒大譜，十八大筤都唔知止唔止﹗之前冇講，依家補番講，我地依個團係由中央教育部方面資助既，所以有個中聯辦既官員陪同我地一齊去，兩個單位都咁猛，唔難令我地諗到點解依餐點解咁豐富，官字兩個口，食都食得多D。(講笑，有官員睇度既話唔該唔好咁認真，小朋友唔識世界嘛，嘻。)講番D食物，話晒內蒙都內陸地區，雖則有黃河在左近，係飛機上亦見好多農田，但都係以食肉為主，冇乜魚同菜，而且偏向spicy(有冇人識寫依個字？)。好在我都唔揀飲擇食，唔駛餓死。
晚上八時正，交流&歡迎晚會開始，我地同內大生卡啦咁坐，本身我既策略係睇下果到邊個女仔坐左先，我先坐埋去，點知佢地又係等我地坐左先，卒之兩個男生坐左係我隔黎，失策﹗一坐低，兩個內大生就即爭住同我講野，好在平時睇得多《我猜》，訓練有數，普通話對答還可以，傾得幾開心下，我地什至傾到國家大事添，哈哈。講番個晚會，整體黎講算係唔錯，當地既學生比起我地想像之中更為熱情，而且好識得表現自己，唔會怕醜，只要一拎至咪係手上，說話就會源源不絕，令當晚既氣氛攪到好好。
交流會結束之後，我地同內大生圍住校園走左個園，順便傾下計，一傾之下先知佢地既視野真係好廣闊，唔好講話大概了解下整個中國既情況，就連日本同韓國既GDP都可以隨口講到出黎，果個學生仲要係讀中文系既咋喎，真係咪話唔驚。雖然香港係一個資訊爆炸既社會，依D資料可能隨手上下網都搵得到，但係有幾多個學生真係會搵依D野黎睇、黎記？相反，佢地搵資料來得俾我地少，但就係因為少，佢地識得珍惜，亦識得運用，回想香港雖然將會攪通識教育，但有幾多學生真係會將依一科所學到既野裝備自己？又會有幾個學生考完就算，搵完補習拎個A就算？依一點，我自慚形愧中……
向內蒙出發 – 草原上的Engine人 (第二日 六月二十五日 無盡的晴空&星空)
昨晚組長吩咐落，執定D野落背囊，唔駛帶Gip去蒙古包，因為之後仲會住番依家間賓館。依個真係一個好複雜既問題，背囊咁丁個，點樣可以帶咁多野？仲要帶埋第三日去包頭既野果下神奇……於是乎，又幾簡得幾簡，簡陋之下果然有D問題，埋下伏線先……
八點鐘食早餐，又係好豐富既一餐，有包有麵有肉有湯，樣樣都唔錯，但特別既係當地既奶茶﹗強調「當地」兩個字，就係因為「當地」既奶茶同香港既完全唔同。香港既奶茶，係茶中加奶，但內蒙嘛，奶源豐富，反而係奶中加茶，有強烈既奶味，飲慣香港既會覺得好怪，但飲落去咸咸地，其實唔錯。
九點鐘，出發去格根塔拉草原，亦即係蒙古包既所在地﹗﹗
去蒙古包既車程有成三、四個鐘，本身都預左補充番因睇波冇左既睡眠時間。但當去到車程一半，一望窗口，竟然已經係一個個無盡既草源﹗雖然有時睇D wallpaper都會見到D一望無際既地平線，但絕對唔會比親眼目睹果下咁震撼﹗依一個驚喜，對於我地幾個讀緊電腦工程既同學仔黎講真係無可比擬既感動，無他，長駐係四面都係牆既電腦房，日日夜夜都係對住部無情既電腦，忽然間，去到一個無拘束既大草原，成個學期積積埋埋既壓力彷彿於無形間消失得無影無蹤，不禁大嘆︰「我無黎錯依度﹗」
下午十二時半，到達左格根塔拉，見到各式各樣既蒙古包，有戰車型、有酒店型，而我地住既係簡樸型，要體驗內蒙古生活嘛，哈。不過雖則係簡樸，個蒙古包底都係有石屎做底，後尾問番，原來依家既蒙古人好多都已經定居左，所以好少會再用D即時搭建既蒙古包lu。
影左幾幅相之後，我地行左去個空地到，原來有個歡迎儀式，一班著住蒙古服飾既人載歌載舞咁帶我地行到紅地毯到排成一排，之後就每個遞一個小杯既酒俾我地。有睇過電視都知到蒙古既酒酒性好猛，三杯不醉都已經好威，我平時飲一罐啤酒都已經盡，突然間黎個咁激……不過既然係歡迎儀式，無理由抗拒架，於乎小試一口，果然，直燒喉嚨﹗果一刻除左笑，已經唔知道講咩……
飲完酒之後，好在未暈，安頓好晒D行李後就去食晏。
走入餐廳，原來有表演睇，係蒙古戲曲。但一來唔好聽，二來聽唔明，三來好肚餓，於是冇理佢，食野算。今餐既主菜係煮羊肉，除左兩個食唔到羊既女仔之外，我地個個都好期待。不過，係未黎主菜之前，先黎好豐富既前菜，無錯，係豐富既前菜，估唔到佢地連雞都只當係前菜，不過又係既，果到食牛食羊，隻隻都咁大隻，雞咁丁隻，係前菜架啦……食到咁上下，主菜終於黎啦，煮羊肉全隻出場﹗
依一下真係好攪笑，冇意味過佢真係成個足球咁大個咁上碟，正考慮緊係咪輪住每人咬一啖之際，發現原來有把平時去大快樂鋸扒既刀，於是組長大人浩哥就出手解決佢。睇住佢出盡九牛二虎之力去殺一隻羊，我地明白到咩叫獅子撲兔都出盡全力既道理，為左報答佢，我地食多左幾件，哈。講笑姐，其實要切出黎真係好辛苦，我地又未去到庖丁個level，唯有請教趙生(導遊)。果然，佢純熟既刀法好快手就切左好多片肉出黎，佢唔做教授既話真係可以考慮下做切羊肉。講番D羊，除左難咬左少少之外，基本上都幾好食，o趙下o趙下用黎送酒就真係一流。
食野期間有個小插曲，就係我地阿朝健兄本來想問侍應拎多個杯，於是乎佢用普通話講啦︰「可以給我一個杯嗎？」點知個侍應笑一笑，答︰「English…」。老友，普通話都讀得字正腔圓嘛，哈。
食完飯，我地周圍玩下相機，影下相，見到咁靚既環境真係好難忍手，嘻。
到兩點半，我地去睇表演，有摔跤同騎術表演。唔講真係唔知，原來日本人認為佢地係源於蒙古，所以D蒙古酒同日本既sake有D似，摔跤既手法亦同相撲有D類同。至於騎術，可謂嘆為觀止，三匹馬並排俾六個人係度玩疊羅漢，夠膽練依下野已經唔講得少，做到出黎果下真係令人覺得不可思議﹗
睇完表演，到我地自己玩，試下騎下馬仔，坐下駱駝車咁。攪笑既係，有駱駝見我地影相，竟然識笑!?
本來仲可以騎多陣馬，但我地見冇乜特別，於是乎我地走去玩第樣-----四驅車。
雖然未考到車牌，但都玩得，係越野上奔馳既感覺真係唔話得，唔識得用言語去形容，自己想像啦﹗
比較特別既係，玩既途中我地經過左叫敖包既祭壇，帶住我地行既哥哥叫我地拎住支香圍住個壇順時行三個圈，逆時行三個圈，之後簽香油錢，咦？難道依個係內蒙古祈福黨集團!?
玩完車之後，就去左買手信，成班友癲左咁，見講到價就狂買，當然，我都唔例外，嘻。
七點鐘，晚飯時間，繼上餐煮羊肉之後，今次到烤羊肉。
見到咁大隻脾，已經流晒口水，差D唔等人切，就自己一口咬落去。經過浩哥巧妙既切片後，我地個個爭住食，果然，冇令我地失望，真係好好食，我夠膽講，比起煮羊肉係有過之而無不及﹗
正當食得興起之際，果班著住蒙古服飾既人入左黎，原來係敬酒。敬酒係蒙古人既傳統，佢地會敬客人三杯酒，如果客人可以三杯不醉，當地既人就會好尊敬佢。面對咁既情況，幾大都要飲既啦。飲左三杯之後，我一如既往，成塊面紅晒，連眼都紅埋，攪到成台人都好擔心。但另一邊箱更厲害，浩哥飲極唔停，仲嫌個酒杯細，換個平時去酒樓飲汽水既大杯，令到我地幾個今晚同佢「同包訓」既人好緊張，諗緊駛唔駛收起晒D利器。
晚飯過後，我地去睇篝火晚會，又係D我地唔識欣賞既歌舞表演，雖則幾佩服佢既聲勢可以同莫華倫相比，我地幾個即場學都學唔到，但都係忍受唔住，於是我地離隊走左去空礦地方睇星星。
真係唔係我誇大，香港既星空完全唔可以同內蒙既星空比較，唔駛抬起頭，就咁直望，單眼睇到既星星已經比香港所睇到既多。雖然我地幾個都冇研究天文依方面既野，但可以係人生之中見到咁美妙既畫面，已經覺得一切都不重要。
向內蒙出發 – 初遇晨曦 (第三日 六月二十六日 繼續晴空)
原本以為去到大草原依D咁偏僻既地方，一定會Miss左兩場世界盃，點知當地做得旅遊區，竟然體貼到有酒吧播波，真抵鍚﹗﹗於是，當晚幾乎成團人去晒間酒吧到睇英格蘭對厄瓜多爾，由於當地人唔太熱衷於足球，攪到我地好似包晒成個場咁，認真巴閉﹗不過，我地幾個睇完上半場之後，就番左去訓，因為，好戲在後頭。
其實好戲有兩個，一，就係三點既荷蘭對葡萄牙，依場我同朝健都好期待，所以寧願放棄反英格蘭，都要睇；二嘛，就係日出，難得黎到咁空曠既地方，唔睇皮蛋黃都要睇依個咸蛋黃﹗於是，我地較好鬧鐘之後，打開埋蒙古包上面個天窗，睇住星星大覺訓啦。
誰不知，未等到鬧鐘鬧聲，先被午夜既寒風刮醒，真係好凍﹗粗略估計，應該得番十二、三度左右，攪到不停失溫，無辦法之下，唯有冒住有「千年蟲」既危機蓋上「千年被」黎訓，先勉強訓得著（旋按︰依個係我阿姨聽收音機講既，佢話蒙古包入面D被完全唔洗，個個都蓋過，有人仲見過有蟲添~﹗）。
去到三點，耳邊響起李克勤既「情非首爾」，等佢唱多兩句之後，身旁既樹熊忍唔住起身，依個時候我先慢慢起身，同佢講聲︰「唔該，係我既。」無錯，其實係我手機鬧鐘既聲音。嘈醒左唔睇波既樹熊，我叫醒埋朝健，就急急腳走左去啦。
去到酒吧，得番幾丁友，包括我地中聯辦既官員熱水球(原名︰葉水球)，可見大家之前果日都玩得累了嘛﹗所以相較於上一場英格蘭，大家都冇乜力叫lu~
依場波我地又係睇得半場，之後就要出發去睇日出。叫醒埋劉邦同樹熊之後，本來打算去洗個面先行，但一來當時已經好凍，唔太想行番轉頭去老遠既洗手間，二來當地冇熱水系統，水喉流既水完全係冰水黎，拎黎洗面簡直係自己同自己玩「凍柑」，所以最後我地都打消左個念頭，直接去睇日出算。
四點幾去到企定定，見到天開始光，我地都好期待。而估唔到既人，果到竟然有隻狗走埋黎，同我地一齊睇添。睇見隻狗既眼神帶點憂鬱，我地仲笑話佢原本仲有隻狗女陪佢睇，依家肯定諗番起D傷心事，哈。
等左成個鐘，成班友企晒係度吹風，個太陽終於肯係個山頭冒出黎俾我地見啦﹗﹗果一下既感動，真係唔識用任何既說話去形容﹗﹗
睇完咁靚既畫面之後，我地都心滿意足，總算冇白費一番心機起身。玩多陣相機之後，我地就番番去訓啦。
訓到八點半，食埋個早餐，我地又出發，今次係去探訪蒙民家庭。
原本以為蒙民一定住蒙古包，點知去到除左有幾個蒙古包之外，仲有一間修葺緊既平房，入去一睇，間間房都好大。特別既係，佢地訓既唔係一張張獨立既床，而係一個約一米高由房去到窗既大櫃，上面再鋪張毯，咁就俾幾個一齊訓。不過依個都唔係最神奇，更加令我地驚訝既係，佢地既廁所竟然裝左按摩浴缸﹗後尾聽番趙老師講，佢話蒙古人養埋咁多生畜，其實好有錢。所以話，唔好成日用既定眼光睇人。
睇完之後，我地入左去其中一個蒙古包，主人家請我地食幾款特別既奶製食品，味道都係酸酸地咁，但幾好咬口，唔錯唔錯。但當我地食緊野時，個主人家唔係太笑，我地以為佢唔係好歡迎我地，於是成班就撩佢傾計，點知傾傾下佢突然話不如唱首民族歌曲我地聽，仲換埋蒙古服陪我地影相，果一刻真係有D受寵若驚。其實會唔會只要你對蒙古人熱情，佢地就會熱情咁對番你呢？
探訪完之後，我地上番車，再向下一站出發------包頭。
包頭依個城市其實主要靠一間企業帶動，果間野叫做包頭鋼鐵，係全球一百強企業之一，我地聽日就會去果到參觀。係未去到之前，我地先係中途既一個小城市武川食個午飯先。
今餐我地食一種叫做莜麵既物體，佢有好多種形狀，係點D醬汁黎食既。但其實佢俾我既感覺只係一堆粉皮，口感唔太好，可能唔太肚餓掛。
食埋野之後，就上車大覺訓。訓到中路，有人撩鋤D，咁就玩啦。初頭都贏到既，點知後尾一玩計分即刻乃晒野，連炒兩鋪，有人見到咁既情況即刻抽水，話落車前最低分果個罰唱歌。雖然輸緊，但無理由縮沙咁，於是奮力頑抗，攪到臨落車前幾個都差唔多分，於是我快速派牌，期望力挽狂瀾，可惜，最後都係輸左，要唱歌。不過，唔緊要，有拖冇久(旋按︰到依家都未唱，大家唔好篤爆我，嘻﹗)。
四點終於到達到包頭賓館，個個一拎左房匙之後，即衝上去爭住沖番一日冇沖過既涼。
六點半食埋晚餐之後，八點鐘自由活動。雖然已經係八點鐘，但當地既日照時間好長，到九點先真正入黑，所以都唔怕蕩失路。原本打算去打保齡球，但估唔到佢地價錢追得上香港，所以我地都係決定行街街，繼續補充手信。
去到一條類似女人街既步行街，乜都有，有衫有褲有鞋有玩具，但樣樣都好似熟口熟面，好似係深圳都見唔少，其實依D野係咪真係全中國都有得賣架？卒之最後只係買左個五皮野既「米刻」電話繩就歸去了。
但當我地沿路番去時，見到八一公園果面好熱鬧，原來係小食檔，我口痕痕梗唔會錯過啦。於是買左個油炸冰淇淋同幾串羊肉串，真係唔錯。
去埋超市shop下零食之後，攪到十點，我地番去酒店準備睇意大利對澳洲。除左樹熊要保衛番家國之外，我地幾個都撐意大利。可惜，等左好耐都冇入波，我地都好眼訓。終於，最後一分鐘，偉大的意大利左後衛博到十二碼，隨住旁述暴走中既咆哮，我地亦都終於訓得。
有圖版請睇#124
向內蒙出發 – 黃沙中的小朋友 (第四日 六月二十七日 少雨) (#227 為有圖版)
一朝早食完一個豐富既自助早餐之後，我地就出發去包頭鋼鐵廠。依間野真係唔話得少，有包鋼依間公司先至有包頭依個地方既繁榮，佢不但止為市民帶來工作機會，而且提供包頭市既電力，真係可以講主宰依個地方既命脈。搭左一陣車，終於入到工業區，厲害既係成個觀塘咁大既地方都係佢既，一條又一條既管道連接住不同工序既地方，成個地方真係好有規模﹗更興奮既係見到個熔爐同動畫入面見到既一模一樣架，哈哈哈。
睇完工廠之後，十二點都未夠，我地就番去賓館食午飯，所以其實根本未肚餓。但唔知係趙老師玩野定係間賓館玩野，又黎幾廿萬道菜，食都食唔晒。更驚喜既係，本來見到佢出左生果盤之後，以為已經黎晒啦，點知每隔五分鐘又黎一道菜，直至我地走果一刻佢都好似仲出緊菜，攪到我地都唔好意思留係果到啦……
食飽飽之後，就向住依個旅程其中一個我地最期待既地方------響沙灣進發。地如其名，響沙灣有依個名係因為果到既沙好響，不過可能我有少少撞聾，其實我唔係太聽得到。
下午兩點半鐘，終於到達左響沙灣，真係成個火舞黃沙咁，攪到我地個個都好興奮﹗﹗
由於車行唔到落去沙到，我地要坐吊晒腳既吊車吊過去，就係依個時候，一個原本用黎載D沙番屋企既樽由坐我後一架吊車既劉邦見證住，從我既腰間跌左落深淵，樽樽，做乜要拋棄我？算，買過。
坐完吊車去到對岸，當地既員工即刻幫我地包實晒隻腳，防止D沙入腳，攪到個個都好型。完成之後，個個都好High咁衝落D沙到，好似咁大個仔未見過沙咁，哈。係沙到狂奔完，趙老師就帶我地玩真係依世人都未試過既野------騎駱駝﹗真係好過癮，佢比騎馬更巧妙之處就係隻駱駝隻跪低俾你騎上去，真係好乖巧，連我果隻載隻耳環咁潮既駱駝都識咁做，可見駱駝真係幾溫馴。
騎左半個鐘之後，趙老師就俾個自由時間我地玩自己野，之後約實時間再一齊玩滑沙。其實果到真係好多野玩，有我地玩過既四驅車，有碌波波（旋按︰其實係個人係個波波入面跟住佢碌，我應該話係碌人定係碌波呢？），仲有降落傘，真係成個荔園咁。不過樣樣都係錢，我地都係玩D唔駛錢既算，影相，嘻。
影到咁上下，大家就去滑沙果到集合。雖然果到望落去都好高下，但依個只有增加我地興奮既程度，因為成班都係膽生毛既年輕人嘛，哈哈。果然，真係好過癮，絕對唔能夠用一般公園既滑梯可以比擬，我亦都唔識得用文字影容啦，有機會大家親身試下啦，哈﹗
玩完之後，又搭吊車，同樣既事再次發生，又跌野，今次仲要係跌我心愛既相機套，套套，點解你要離開我？……本來諗住去紀念品店殺下價平復番個心情，點知殺得太過份，攪到個sales話︰「不賣啦﹗」，真係Hurt爆。
六點鐘，番番包頭食飯，因為朝早過份豐富既情況，今餐縮皮，少左幾道菜，仲要全素，依下真係幾surprise下。
食完飯，經過三個小時既車程，番到呼和浩特市，訓番內蒙大學入面既桃李湖賓館。由於跌左相機套既我變得有D神智不清，被排斥到一樣發左癲狂玩「水擘擘」既樹熊同房，真係陰公。但正當別人笑我地太瘋癲既時候，原來隔黎房既劉邦同朝健更看不穿……
P.S.當晚一路睇住巴西對加納，一路食住當地既公仔麵五谷道場同康師傅，的確幾好食，特閒要入貨﹗
[ 本帖最後由 麥旋風 於 2006-7-30 02:50 PM 編輯 ] | 
IP卡
狗仔卡
發表於 2006-6-24 05:44:06
提升卡
置頂卡
沉默卡
喧囂卡
變色å¡
顯身å¡
發表於 2006-6-24 10:33:17
